الصبر على شريك الحياه

الصبر علي شريك الحياة 😘

📌 في واحدة جوزها عصبي جدا ... وكان لما پيتخانق معاها كان بيبقى صعب جدا  وأحيانا كان بيضربها ... هي حاولت معاه بطرق  كتير عشان تحل المشكلة دي لكنها فشلت ..و هي لو طلبت الطلاق كان هايبقى عندها حق وماحدش يقدر يلومها
هي قررت انها تصبر على الوضع الصعب ده وتتعامل معاه ...مش قلة حيلة او قهر ... بالعكس ... أهلها كانوا بيدعموها في قرار الطلاق.... لكن ده كان تقييمها للوضع وده قرارها.
جوزها بعد فترة تخلى عن كتير من عصبيته .... طبعا لحد ما ده حصل (وكان ممكن مايحصلش)  هي عاشت معاه لحظات كتير صعبة جدا...  لكن ده كان إختيارها الشخصي ودي الحسبة بتاعتها.

📌 وواحد تاني زوجته سليطة اللسان .... لما بيختلفوا بيسمع منها كلام صعب جدا... كلام صعب إن أي راجل يقبله ...إستنفذ حلول كتير لتقويمها ... وفشل للاسف... لكن هو صابر على الوضع ده ....مش ضعف شخصية او قلة حيلة ...لكن وجهة نظره إن بقاء البيت رغم صعوبة أخلاق مراته أفضل من هد البيت ... ده رأيه الشخصي.... ودي الحسبة بتاعته.

ممكن لو حد فينا مكان النماذج اللي فوق دي ماكنش إستحمل أبدا الوضع وكان إختار الانفصال ....والانفصال وقتها هايكون إختيار منطقي و معتبر ومفهوم.

تحديد أقل الخساير بيختلف من بيت لبيت ....في بيت لما بيتأزم والناس فيه بتفشل في الوصول لحل...  بيكون الانفصال هو أقل الخساير .

قدرة كل واحد فينا على التحمل وحسبة كل واحد مختلفة عن التاني ... وظروف كل بيت وتفاصيل كل مشكلة مختلفة عن التانية.

عشان كده بلاش تضغط على حد عشان يتحمل موقف اوحياة لا تحتمل ...لمجرد إن في ناس تانية ساكتة ومستحملة.
وفي نفس الوقت بلاش تستنكر موقف حد كان قراره الشخصي إنه يصبر على وضع ممكن يكون صعب على كتير مننا انه يتحمله وتفضل تدفعه لقرار معين 
.
الصبر ... أحد الإختيارات المعتبرة اللي ماينفعش نلوم الناس عليها ... بشرط إنه يكون قرار شخصي من الشخص المتأزم بدون ضغط من اللي حواليه..
لكن إننا نضغط على شخص عشان يتحمل وضع لا يحتمل ... ده إسمه ظلم لا يرضاه الله عز وجل.